Clams novèus
Dia d’Estudis Aigaberdenc 2025/
Divés 20 que ièram uns 29 deth cors d’Aigaberdenc e deth cors der’UTL Tarba a descobrir era vila d’Aush. Gavidats eth maitin per Joan-Miquèu Espinassa, en mensprètz dera calorassa, qu’èm hèit ua virada pera vila hauta, der’evocacion d’Elimberri ath Intendent Antòni Megret (non, pas lo comissari) d’Etigny en passant per’esplendor deths veiriaus d’Arnaut de Mòlas ena catedrau. Eth vrèspe eth teatre ar’italiana e eth Musèu deras Americas que ns’arcuelhón. En aqueste musèu qu’i podom apreciar, hòra deras colleccions precolombianas esmiraglantas, quauques objèctes istorics associats ath noste ermite lavedanés Sent Orens qui estó arquevesque d’Aush.
Poeticas 2025
Divés 21 de març, dia internacionau dera poesia, Aigaberdenc que’vs prepausa, peth tresau còp, un encontre bilingüe autorn dera poesia occitana a Sent-Savin, sala dera Maison comuna. Que d’ei « Poeticas » qui tira camin. Ath briu deths nostes encontres regulars a Aigaberdenc, qu’èm estudiat augan drin mes de poesia, descobrit mes d’autors. Aquerò qu’a neurit un imaginari partatjat. Quauques uns qu’an escrivut, d’autes qu’an cercat tèxtes, que n’an causits tà leguí’us. Lavetz que’vs prepausam de vier partatjar aquera pòsa de lecturas dab nosautis. Puish, un co5p de mes que’s convidarà la musica coma companha dera paròla poetica. Qu’avem tornat convidat a Paulina Kamakina. Qu’a botat tèxtes sués en musica e que serà dab nosautis acompanhada d’un guitarrista.
DICTADA OCCITANA 2025 : Fabiana VAYRETTE-PECHALI A SENT-SAVIN
Fabiana Vayrette que ièra dab nosautis a Sent-Savin entara Dictada Occitana 2025.
Que podom apréner a conseisher-la mes plan ath parat d’un escambi miat per Tresià Pambrun. Sus era tela que poderatz descobrir l’univèrs de Fabiana en seguint eths ligamis qui botam ací devath :
Comandar lo son recuelh de novèlas « E víver !« , sus eths siti de Reclams.
Escotar a Fabiana, intervistada per Domenja Lekuona : En Ondas, setmana 06, sus eth siti « Hadiu« .
Shens papèrs, era video.
Lo gat de Xhoanna, un libe taths mainats en linha.
Los hius invisibles, un libe taths mainats en linha.
Ua leçon de vita, un libe taths mainats en linha.
Era dictada a Sent Savin, per un beròi dissabte de hervèr, qui s’acabè per un bernar de pastèr, coquets e còcas casahèitas.
